ករណីឃាត់ខ្លួនលោកផ្កាយពីរ វ៉ាន់ កុសល និងបក្ខពួក មិនមែនពាក់ព័ន្ធគ្រឿងញៀននោះទេ គឺពាក់ព័ន្ធបទកំហែងយកលុយចំនួន ៣ម៉ឺនដុល្លារ

Roth - ១០ វិច្ឆិកា ២០២៣

(ភ្នំពេញ)៖ នាយឧត្ដមសេនីយ៍ ម៉ក់ ជីតូ អគ្គស្នងការរងនគរបាលជាតិ ទទួលបន្ទុកបង្ក្រាបបទល្មើសគ្រឿងញៀន បានលើកឡើងថាៈ ករណីឃាត់ខ្លួនលោកឧត្ដមសេនីយ៍ទោ វ៉ាន់ កុសល អនុប្រធានមន្ទីរប្រឆាំងបទល្មើសគ្រឿងញៀន និងបក្ខពួក ៤នាក់ ទៀត មិនមានពាក់ព័ន្ធ បទល្មើសគ្រឿងញៀនទេ! ប៉ុន្តែពាក់ព័ន្ធបទល្មើស កំហែងយកលុយពីជនសង្ស័យគ្រឿងញៀនចំនួន ៣ម៉ឺនដុល្លារ ជាថ្នូរនឹងដោះលែងវិញ។

តាមដំណើររឿង នៅពាក់កណ្ដាលខែតុលា ឆ្នាំ២០២៣ លោកឧត្ដមសេនីយ៍ទោ វ៉ាន់ កុសល បានស្នើសុំគោលការណ៍ពីលោកឧត្ដមសេនីយ៍ឯក ឃីង សារ៉ាត់ ប្រធានមន្ទីរប្រឆាំងបទល្មើសគ្រឿងញៀន ដើម្បីចុះបង្ក្រាបជនជាតិចិន សង្ស័យពាក់ព័ន្ធបទល្មើសគ្រឿងញៀន ។ លុះចាប់ឃាត់ខ្លួនបានជនជាតិចិនទាំងនោះគ្មានភស្តុតាង ពាក់ព័ន្ធបទល្មើសគ្រឿងញៀនទេ។ បន្ទាប់ពីឆែកឆេរគ្មានភស្តុតាងបទល្មើសគ្រឿងញៀន លោកឧត្ដមសេនីយ៍ទោ វ៉ាន់ កុសល បានសុំគោលការណ៍លោកប្រធានមន្ទីរប្រឆាំងបទល្មើសគ្រឿងញៀន ដើម្បីអនុញ្ញាតអោយពួកគេត្រលប់ទៅវិញ ដោយលោកប្រធានមន្ទីរបានឯកភាពតាមការស្នើសុំ តែមិនបានអោយលោកឧត្ដមសេនីយ៍ទោ វ៉ាន់ កុសល យកលុយជនជាតិចិននោះឡើយ។ តែផ្ទុយទៅវិញលោកឧត្ដមសេនីយ៍ទោ វ៉ាន់ កុសល បានទាមទារលុយពីជនជាតិចិនទាំងនោះចំនួន ៣ម៉ឺនដុល្លារ ជាថ្នូរនឹងការដោះលែង ដោយទៅយកលុយដល់ធនាគារថែមទៀតផង។

ជនជាតិចិនទាំងនោះ បន្ទាប់ពីប្រគល់លុយអោយទៅលោកឧត្ដមសេនីយ៍ទោ វ៉ាន់ កុសល និងបក្ខពួករួចហើយ ពួកគេក៏ប្ដឹងមកថ្នាក់ដឹកនាំក្រសួងមហាផ្ទៃ ដើម្បីទាមទាររកយុត្តិធម៌។

បន្ទាប់ពីមានការប្តឹងពីភាគីចិន មន្រ្តីជំនាញបានធ្វើការចុះស្រាវជ្រាវ និងពិនិត្យភស្តុតាងជាក់ស្តែង រហូតឈានដល់ការឃាត់ខ្លួនលោកឧត្ដមសេនីយ៍ទោ វ៉ាន់ កុសល និងបក្ខពួក៤នាក់ទៀត ក្នុងបទល្មើស”កំហែងយក” លុយចំនួន ៣ម៉ឺនដុល្លារ ពីជនជាតិចិន៕