ព្រះសីហនុ៖ ក្រុមបវរកញ្ញាមកពីជុំវិញពិភពលោក បានធ្វើដំណើរមកប្រទេសកម្ពុជា ថ្លែងក្នុង បទសម្ភាសន៍កាលពីល្ងាចថ្ងៃទី១៨ ខែមីនាឆ្នាំ ២០២៤ អ្នកនាង ប្រាសាទ ដាវីន ដែលជាអ្នក ទទួលបន្ទុកក្នុងការរៀបចំការប្រកួតអន្តរជាតិនេះ បានឲ្យដឹងថា ដើម្បីចូលរួមប្រកួត ប្រជែង កម្មវិធី Universal Woman ២០២៤ ដែលកម្ពុជាធ្វើជា ម្ចាស់ផ្ទះ។ ក្នុងកម្មវិធីប្រកួត អន្តរជាតិនេះ បានចាប់ផ្ដើមកាលពីថ្ងៃទី ១៤ ដល់ ថ្ងៃទី ២៤ ខែមីនា ឆ្នាំ ២០២៤ នៅទឹកដីអង្គរ-ខេត្តសៀមរាប។ អ្វីដែលសំខាន់ អ្នកស្រី បានដឹកនាំបេក្ខភាព Universal Woman 2024 ទាំងអស់ គ្រងនូវឈុតអប្សរាខ្មែរ ដើម្បីថតរូបនៅប្រាសាទអង្គរវត្ត ថែមទៀតផង។

ជាមួយគ្នានោះ លោកជំទាវ អ៊ូ ធីតាពៅ គួចចំរើន បានអញ្ជើញ បវរកញ្ញាពិភពលោក មកពីប្រទេស ផ្សេងៗចំនួន ៥០ប្រទេសបន្តមកទស្សនកិច្ចខេត្តព្រះសីហនុ ក្នុងនាមជាម្ចាស់ផ្ទះ លោកជំទាវក៏បានរៀបចំ សណ្ឋាគារ KD Hotel លំដាប់អន្តរជាតិ បន្ថែមពីរនោះលោកជំទាវ អ៊ូ ធីតាពៅ គួចចំរើន ក៏បានណែនាំដល់បវរកញ្ញាអំពីរបៀបកាច់ផ្ការំដួល និងបានជូននូវស៊ីងបុរាណខ្មែរយើង និងកន្លាសអាវរូបផ្ការំដួល ជូនដល់បវរកញ្ញាជាអនុស្សាវរីយ៍ រួចបន្តទៅបង្ហោះគោមដុតកាំជ្រួចនៅមាត់ឆ្នេរសមុទ្រឆ្នេរអូត្រេះ ក្រុងព្រះសីហនុ ដើម្បីបង្កើតឲ្យ ភាពសប្បាយរីករាយផងដែរ។ ការចូលមកទស្សនៈកិច្ចរបស់បវរកញ្ញាជាង៥០ប្រទេស មានរយៈពេល១ថ្ងៃ ១យប់ ចូលមកថ្ងៃទី១៧ ត្រឡប់ទៅវិញនៅថ្ងៃទី១៨ ពេលល្ងាចទី១៨ ខែមីនា ឆ្នាំ២០២៤។

ឆ្លៀតក្នុងឱកាសចូលរួមក្នុងពិធីបុណ្យទន្លេ លើកទី៨ ឆ្នាំ២០២៤ ក្រុមបវរកញ្ញា Universal Women បានទៅកម្សាន្តនៅតារារះនៃទិសនិរតីរបស់កម្ពុជា គឺខេត្តព្រះសីហនុ ។ ក្នុងនោះ ក្រុមបវរកញ្ញា Universal Women បានចូលរួមបង្ហោះគោម និងបាញ់កាំជ្រួចនៅឆ្នេរអូរត្រែះ នាវេលាយប់ថ្ងៃទី១៧ មីនា ។

ដើម្បីបង្ហាញអំពីសក្តានុពលរបស់ខេត្តព្រះសីហនុ ជាពិសេសនៅតាមតំបន់កោះ និងតំបន់ រមណីយដ្ឋាននានា នៅថ្ងៃទី១៨ ខែមីនា ឆ្នាំ ២០២៤ រដ្ឋបាលខេត្តបានសម្របសម្រួលជូន បវរកញ្ញាចម្រុះជាតិសាសន៍ចំនួន ៥០ ប្រទេស ទៅទស្សនានៅក្នុងក្រុងកោះរ៉ុង ខេត្តព្រះសីហនុ ដែលជាតំបន់ទេសចរណ៍នៅលើដីកោះ មានធនធានធម្មជាតិ ធនធានជីវចម្រុះបាតសមុទ្រ មានឆ្នេរវែងសរល្អស្អាត ក្នុងការទាក់ទាញភ្ញៀវទេសចរជាតិ និងអន្តរជាតិទៅទស្សនា និងសម្រាកលំហែកម្សាន្ត។

ជាក់ស្ដែងនៅថ្ងៃនេះ ក្រុមការងារបានជូនបវរកញ្ញាទាំង ៥០ប្រទេស ទៅទស្សនាចំនួន ពីរទីតាំងទី១ នៅឆ្នេរសណ្ឋាគាររ៉ូយ៉ាល់សេនលំដាប់ផ្កាយប្រាំ របស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងទីតាំងទី២ នៅឆ្នេរឋានសួគ៌ ស្ថិតនៅក្នុងសង្កាត់ កោះរ៉ុងក្រុងកោះរ៉ុង ដើម្បីបង្ហាញទៅដល់បវរកញ្ញាទាំង ៥០ប្រទេស បានទស្សនាអំពីតំបន់ទេសចរណ៍ ដែលមានឆ្នេរខ្សាច់សល្អស្អាត មានសណ្ឋាគារលំដាប់ផ្កាយសម្រាប់ទទួលស្វាគមន៍ ទៅដល់ភ្ញៀវទេសចរទាំងជាតិ និងអន្តរជាតិ មកសម្រាកលំហែកម្សាន្ត។

ក្នុងដំណើរទស្សនកិច្ចនេះដែរ ក្រុមបវរកញ្ញាទាំងអស់មានការសប្បាយរីករាយ ដោយឃើញអំពីការអភិវឌ្ឍនៅលើដីកោះមានឆ្នេរ មានសណ្ឋាគារលំដាប់អន្តរជាតិ មានធនធានធម្មជាតិ ល្អស្អាត ដែលជាការទាក់ទាញ និងចាប់អារម្មណ៍ ក្នុងការផ្សព្វផ្សាយអំពីសក្កានុពលរបស់ខេត្ត ព្រះសីហនុ ជាពិសេសនៅតំបន់ដីកោះ។

ជាមួយគ្នានេះដែរក្រុមបវរកញ្ញាទាំង ៥០ប្រទេស ក៏បានបន្តទស្សនាការអភិវឌ្ឍនៅក្នុងក្រុងព្រះសីហនុ និងទស្សនាការស្ថាបនាខ្មែរធ្វើបាន និងទីតាំងព្រះថោងនាងនាគ ដែលជាកន្លែងទេសចរណ៍វប្បធម៌ដ៏សំខាន់មួយ ក្នុងការអភិវឌ្ឍរបស់ខេត្តព្រះសីហនុផងដែរ ៕