កណ្ដាល៖ នៅថ្ងៃទី២៣ ខែធ្នូ ឆ្នាំ២០២៣ សហភាពសហជីពកម្ពុជា-អាស៊ាន បានរៀបចំសិក្ខាសាលា ស្ដីពី “ម៉ូឌែលមេដឹកនាំដ៏ជោគជ័យ” នៅទីស្នាក់ការកណ្ដាលសហភាពសហជីពកម្ពុជា-អាស៊ាន ដែលស្ថិតនៅក្រុងតាខ្មៅ ខេត្ដកណ្ដាល។ ការរៀបចំសិក្ខាសាលានេះដោយមានអញ្ជើញចូលរួមពី ឯកឧត្ដម សាត់ ឈាងហួរ ប្រធានសហភាពសហជីពកម្ពុជា-អាស៊ានជាគណៈធិបតី និងលោកបណ្ឌិត គង់ ផារិទ្ឋ ជាធម្មទានាចារ្យ និងជាអ្នកឯកទេសជំនាញបច្ចេកវិទ្យាក្នុងយុគ្គសម័យឌីជីថល និងជាទីប្រឹក្សាកិត្តិយសរបស់សហភាព ជាវាគ្មិន ដើម្បីធ្វើបទបង្ហាញពីប្រធានបទ ”ម៉ូឌែលមេដឹកនាំជោគជ័យ” និងឯកឧត្ដម លោកជំទាវ លោក លោកស្រី ជាសមាជិក សមាជិកាសហព័ន្ធសហជីព និងសមាគមចូលរួមជាច្រើននាក់ផងដែរ។

នាឱកាសបើកសិក្ខាសាលានេះ ឯកឧត្ដម សាត់ ឈាងហួរ ក៏បានលើកឡើងពីប្រវត្ដិនៃការកកើតសហភាពសហជីពកម្ពុជា-អាស៊ាន និងកិច្ចការស្នាដៃកន្លងមកដែលសហភាពចូលរួមទាំងថ្នាក់ជាតិ និងថ្នាក់អន្ដរជាតិផងដែរ។ ឯកឧត្ដម ក៏បានសង្កត់ធ្ងន់ពីខ្លឹមសារនៃប្រធានបទខាងលើ ឱ្យសិក្ខាកាមដែលចូលរួមយកចិត្ដ​ទុកដាក់ និងស្នើឱ្យសិក្ខាកាមទាំងអស់ចូលរួមពិភាក្សាឱ្យបានផុលផុស ដើម្បីយកចំណេះដឹងនេះទៅអនុវត្ដជាក់ស្ដែងក្នុងសង្គមបច្ចុប្បន្ន ជាពិសេសផ្លាស់ប្ដូរ និងអភិវឌ្ឍន៍ ពង្រឹងសមត្ថភាពធឈានទៅរកភាពរីកចម្រើនក្រោយពីទទួលបានការសិក្សានេះ។ ឯកឧត្ដមក៏បានបន្ថែមទៀតថា វគ្គសិក្សានេះនឹងមានបន្ដបន្ទាប់ទៀតនៅខែក្រោយៗ ហើយបើសិនជាសមាជិកសហជីពមូលដ្ឋាន ឬបងប្អូនមានចំណាប់អារម្មណ៍ អាចវគ្គក្រោយៗចូលរួមសិក្សាបន្ថែមទៀតបាន។

ក្រោយពីបញ្ចប់សិក្ខាសាលា ឯកឧត្ដម សាត់ ឈាងហួរ ក៏បានផ្ដល់នៅលិខិតថ្លែងអំណរគុណដល់លោកបណ្ឌិត គង់ ផារិទ្ឋ និងឯកឧត្ដម ជ័យ សុវណ្ណ ដែលបានចំណាយទាំងថវិកា និងពេលវេលាជួយគាំទ្រកម្មវិធីសិក្ខាសាលានេះផងដែរ៕