កម្ពុជា-ចិន នឹងធ្វើសមយុទ្ធនាគមាសលើកទី៦ ធំជាងមុន រយៈពេល១៥ថ្ងៃ ក្នុងខែឧសភានេះ

THY CHOM - ០៨ ឧសភា ២០២៤

សមយុទ្ធនាគមាសរវាងយោធាចិន និងកម្ពុជា លើកទី៦ ឲ្យធំជាងមុន ដែលគ្រោងធ្វើចាប់ពីថ្ងៃទី១៦ ដល់ថ្ងៃទី៣០ ខែឧសភា ឆ្នាំ២០២៤ នេះនៅក្នុងភូមិសាស្ត្រខេត្តកំពង់ឆ្នាំង និងខេត្តព្រះសីហនុ ដោយមានការចូលរួមពីកងទ័ពនៃប្រទេសទាំងពីរ រហូតដល់ជាង២ពាន់នាក់។

គម្រោងសមយុទ្ធនាគមាសរួមគ្នាឆ្នាំ២០២៤ នេះ ក្រោមប្រធានបទ«ប្រតិបត្តិការប្រឆាំងភេរវកម្មរួមគ្នា និងការងារសង្គ្រោះមនុស្សធម៌»។ សមយុទ្ធនៅលើដីគោក នឹងធ្វើឡើងនៅក្នុងភូមិសាស្ត្រស្រុកសាមគ្គីមានជ័យ ខេត្តកំពង់ឆ្នាំង ហើយសមយុទ្ធនៅលើផ្ទៃសមុទ្រ និងលើអាកាស នឹងត្រូវធ្វើឡើងនៅក្នុងខេត្តព្រះសីហនុ។

ឯកឧត្តមនាយឧត្តមសេនីយ៍ ឥត សារ៉ាត់ អគ្គមេបញ្ជាការរងនៃកងទ័ពកម្ពុជា និងជាប្រធានគណៈកម្មការដឹកនាំរួមសមយុទ្ធនាគមាសបានប្រាប់អ្នកកាសែតនៅខេត្តកំពង់ឆ្នាំងកាលពីថ្ងៃទី០២ ខែឧសភា ឆ្នាំ២០២៤ ថា សមយុទ្ធនាគមាសកម្ពុជា-ចិន ឆ្នាំ២០២៤ នេះមានទំហំធំជាងឆ្នាំមុនៗ ទាំងចំនួនកងទ័ព និងចំនួនសព្វាវុធ។ ឯកឧត្តមនាយឧត្តមសេនីយ៍ បានបញ្ជាក់ថា សមយុទ្ធនាគមាសឆ្នាំ២០២៤នេះ មិនមែនជាការគំរាមកំហែងដល់ប្រទេសណា ឬបុគ្គលណាមួយឡើយ ពោលជាសមយុទ្ធដើម្បីផ្លាស់ប្តូរបទពិសោធន៍គ្នារវាងកងទ័ពនៃប្រទេសទាំងពីរ និងក៏ដើម្បីពង្រឹងសមត្ថភាពដល់កងទ័ពកម្ពុជា។

ចំណែកអ្នកវិភាគនយោបាយ សម្តែងការសាទរចំពោះសមយុទ្ធចិន-កម្ពុជា តែសម្តែងការសោកស្តាយចំពោះអវត្តមានសមយុទ្ធកម្ពុជា-អាមេរិក និងកម្ពុជា-អូស្ត្រាលីដែលធ្លាប់មានកន្លងមក។

លោក ឯម សុវណ្ណារ៉ា អ្នកវិភាគ និងជាសាស្ត្រាចារ្យផ្នែកវិទ្យាសាស្ត្រនយោបាយបានប្រាប់អ្នកការសែត នៅថ្ងៃអង្គារ ទី៧ ខែឧសភា នេះថា ជាការល្អក្នុងការពង្រឹងសមត្ថភាពកងទ័ពកម្ពុជាតាមរយៈសមយុទ្ធនានា និងថាវារឹតតែប្រសើរជាងនេះទៅទៀត ប្រសិនបើកម្ពុជានៅមាន «សមយុទ្ធឆ្មាំអង្គរ» ជាមួយសហរដ្ឋអាមេរិក និងនៅមាន «សមយុទ្ធគោព្រៃ» ជាមួយយោធាអូស្ត្រាលី។

តាមលោក ឯម សុវណ្ណារ៉ា បើកម្ពុជាមានសមយុទ្ធយោធាជាមួយប្រទេសលោកខាងលិចទាំងនេះឡើងវិញនឹងជួយទាញទំនាក់ទំនងវិស័យការទូត និងយោធាកម្ពុជា ឲ្យនៅជាអព្យាក្រឹត។

សូមរំលឹកថា សមយុទ្ធរួមគ្នារវាងកងទ័ព កម្ពុជា-ចិន ត្រូវបានប្រទេសទាំងពីរចាប់ផ្តើមតាំងពីឆ្នាំ២០១៦ មកម្ល៉េះ។ តែត្រូវបានអាក់ខានរយៈពេល ២ឆ្នាំ គឺឆ្នាំ២០២១ និង២០២២ ដោយសារការឆ្លងរាតត្បាតជំងឺកូវីដ-១៩។ ដោយឡែក សមយុទ្ធរួមគ្នាជាមួយអាមេរិក និងអូស្ត្រាលី ដែលកម្ពុជាធ្លាប់មានក្នុងអំឡុងឆ្នាំ២០១៦ ដែរនោះ ត្រូវបានបាត់ទៅវិញដោយសារភាពចម្រូងចម្រាសនយោបាយ និងការទូត៕

ប្រភព៖ RFI